Buscando focas en Islandia (Estremeñu)

_DSC4772

Islandia, a meyu caminu entri Uropa i el reondel polal árticu, una isla meyu nuevina i nuna muación costanti, renombrá polos paisagis, las chorreras, los volcanis, las prayas negras peru tamién por sel unu delos paísis más felizis i más alantaus enos derechus socialis. Vais a alcuentral hartalga d’artículus de prensa, noticias o blogs en que vos palran de tó estu, del reondel dorau, dela carretera Ring Road qu’arrodea la isla, las auroras borealis, geisis i muchas otras maravillas naturalis.


Oi vos vo a cuental algu deferenti peru no por ellu menus golosu, dedical una entrieguina pa palral-vus dóndi poel desfrutal i compartil sitiu conas focas en libertá duna manera responsabli i respetuosa.


Ei estau tres vezis en Islandia i las tres é teníu la suerti de vél i arretratal las focas en el abitaeru natural dellas, la praya de Ytri Tunga al norti-ponienti dela isla en tola pinínsula de Snafaellsnes, la primel ves hui por pura suerti: divamus en un bandu granditu nun voluntariagi de proyeutu de retrataúra, cordinau de www.seeds.is i derigíu dendi Madril de www.ongsci.org, i comu muchas vezis me gusta dil ala contra, decedí dil justu pal caminu contrariu del restu del bandu, tuvi la suerti d’atopal-mi con varias focas, essu sí, arriscandu la vida, arrehuyendu delas olas entri los canchus i evitandu comu poía los limius qu’anagavan tó, por ciertu, peligrosu bastanti i refalosu, mesmu ain paí buracus que no se vein i poís tenel un mal sustu… muchu cudiau si vos arrochais a ahilal paí!


Lo güenu paqu’estus animalinus tan salaus puean luzil-si con espeldi palas retrataúras es que la marea andi baxina, aposaus enos canchalis los podremus vél mirandu pal cielu i alentandu airi puru, abocezandu, posturas de yoga o mesmu anguna miraína d’amol! Qué más quixiéramus muchus que mos miraran assín tolos días ena muestra rutina…


El segundu viagi mo-lo tomémus duna manera más ambiciosa, correl la isla en 4×4, encruyendu los Westfjords del norti, es una delas zonas más bravías i menus conocías, en iviernu es compricau vesitá-lu ya que la huerça delas carreteras estás atarugás por causa dela nievi, conque si angunu decidi de dil qu’aprovechi los mesis de marçu a outubri.


Velequí vos queu l’atiju dunu delos sitius pa poel almiral las focas, recomiendu de lleval anteojus, ya qu’esti osservatoriu está un pocu desapartau dela carretera.

De tolas maneras tamién está la possibiliá deque si se corrin los fiordus pola vera dela carretera tengamus la suerti d’alcontral focas en qualquiera sitiu comu mos passó a nogu i que puimus arretratal en estus afotus.


I qué sabemus allá, si aparti delas focas vos puea sosprendel angún parienti de Wally saltandu en meyu’l fiordu comu ena pinícula! Es una delas partis mejoris del mundu pa vél ballenas, mayolmenti en veranu. Asperemus que los islandesis no hagan comu en Japón i güelvan a caçá-llas, no tien sentíu dengunu i sedría un chascu mu grandi.

Hueraparti delas focas, duranti la ruta que vos ei proponíu, está llena de maravillas naturalis: chorreras, glaciaris, barrancus, cratis, volcanis, ilesias en meyu la ná, i la montaña Snaefellsjökull en que Juliu Verne estableci la entrá pal centru dela tierra nel libru famosu.

Velaquí vos queu angún afotu delo que vos poís encontral i asperu que si hazís la ruta lo desfruteis lo mesmu que yo.

Traducido por Juan F. Reina (OSCEC).

¡Comparte esta entrada!
Share on Facebook
Facebook
Tweet about this on Twitter
Twitter
Share on LinkedIn
Linkedin
Email this to someone
email