World Nomad Games 2018 Kirguistán (Estremeñu)

Ola a tós!

Oi enaguru el mi blog col primel indilgu en que vos vo a cuental unu delos más grandis i más emocionantis espetáculus a qu’ei resultau, i qu’á síu una sospresa en tolos sentíus, los World Nomad Games en Kirguistán. Asperu deque vos paeça enteressanti comu pa entral-vus ganas de assestil ena ocasión siguienti que tendrá lugal en el 2020 a Turquía.

Al acabiju d’esta espubricación vos queu l’atiju’l vidiu-reçumi del acontecimientu.

El celebramientu delos III Worl Nomad Games se hizu entri’l 2 i el 9 setiembri a Kirguistán, antiga repúbrica soviética assitá entri China, Tayikistán, Usbekistán i Kazajistán.

La cirimonia dela inaguración ena nochi’l 1 setiembri que dio l’escopetazu de salía al acontecimientu hue un espetáculu verdaeru, el sitiu descogíu hue l’ipódromu duna localidá llamá Cholpon-Ata en vera’l lagu Issyk-kul, el segundu lagu interiol más grandi’l mundu dispués del lagu Titicaca, i lugal de pelegrinagi veraniegu delos turistas kirguisis.

El acontecimientu comu tal era de baldi quasi que tó, desquitandu esta cirimonia i la de fechi, i l’esparramamientu lo mesmu de huerças umanas i técnicas, música, lus, soníu… hue espetaculal, una cordinación i una destreza perfeta entri que se proyetó una mesturança delas tradicionis cambulantis cona modernura que está tentandu de concedel el país.

Pantallas guijantis, rayus lasi, luzis, huegus artificialis, danças, música, escenas tratalis i pala fuga, el desfili a unu a unu delos 70 paísis i más de 3000 atletas hateaus de paísis tan disparis comu Madagascal, el Congu, Nepal, Argentina, Panamá… i ala final queó oficialmenti inagurau col discussu protocolariu típicu del presienti dela Repúbrica, del que no entendimus ná porque era en kirguís, namás que dava las gracias alas mayoranças presentis, talis comu’l presienti de Turquía, Ungría, el príncipi delos Emiratus Arabis, impresarius, diplomáticus…

La pogramación delos juegus andava arrepartía en 2 assitiaerus, el primeru en Cholpon-ata, nel ipódromu i en Sport Complex, andi se celebravan prencipalmenti los deportis que igamus menus tradicionalis, carreras de cavallus, kok-boru, er-enish, tiru de soga, pulsus, sumu, sambu, goresh, etc.

A 40 o 45 km de Cholpon-ata s’enhalla l’otru assitiaeru andi se celebravan otra crassi de deportis digamus más tradicionalis, en Kyrchin, que bien poía acordal los Alpis suiçus. En un valli entri montañas s’alevantava un campamentu de yurtas cambulantis i vículus con genti allegá de tolos laus del país i arreoris, era comu dil patrás unus pocus de siegrus en el tiempu, costrucionis a hechu de maera apreparás pala ocasión, genti agaligá conos hatus tradicionalis, cona horma de vivil cambulanti dellus peru ala mesma ves tó perhetamenti entangau i conas comodidais propias del siegru XXI, prebíu el tráficu menus palos cavallus i los carrus, enganchi ala redi Wifi, lus, agua, quartus de bañu púbricus, mesmu palos empeíus, recoja dela fusca, parti d’agüespedamientu palos turistas enas yurtas, zona d’espetáculus, pala comía, ethno-village, mercau i más cosas paí.

P’arremati de cuentas, una esperencia i un acontecimientu únicu i inolviabli. Velaquí vos queu el vidiu’l acontecimientu.

Traducido por Juan F. Reina (OSCEC).

¡Comparte esta entrada!
Share on Facebook
Facebook
Tweet about this on Twitter
Twitter
Share on LinkedIn
Linkedin
Email this to someone
email